Frambjóðandi 3612

Gísli Hjartarson  #3612

 Giftur Ingibjörgu Heiðdal Friðriksdóttur

Börn: Vigdís Hind og fóstursonurinn Víðir Heiðdal Nenonen

 Ég er fæddur 1. maí 1967 í Vestmannaeyjum þar sem ég hef alið manninn að mestu síðan. Vann reyndar við þjónustu í höfnunum í Grimsby, Bremerhaven og Cuxhaven 1986-1987 og hafði mjög gaman af. Hér heima hef ég unnið ýmis störf. Var lengi í frystihúsunum hér byrjaði 1980 í Hraðfrystistöðinni, svo í Fiskiðjunni og svo síðast hjá VSV. Hætti síðan þar og tók við starfi framkvæmdastjóra í litlu prentfyrirtæki, prentsmiðjunni Eyrúnu, þar sem ég hef verið í forsvari í um það bil 15 ár. Er á öðru ári sem formaður foreldrafélags Grunnskóla Vestmannaeyja en hef verið í stjórn í 5 ár. Auk þessa hef ég starfað nokkuð fyrir ÍBV. Var t.d. í stjórn knattspyrnudeildar í 5 ár og þrátt fyrir að hafa hætt fyrir 4 árum þá reynir maður að hjálpa til ef eftir því er leitað. Gef út Sjónvarpsvísi hér í Eyjum og hef ritstýrt Þjóðátíðarblaði Vm í 3 af síðustu 4 skiptum.

Hef lengi verið samfélagslega þenkjandi og hef verið nokkuð virkur þátttakandi í umræðunni síðustu ár í gegnum bloggið mitt, fosterinn.blog.is, þaðan sem einhverjir gætu kannast við mig.  Ég hef verið ófeiminn við að láta skoðanir mínar í ljós. Það getur verið erfitt í svona litlu samfélagi, eins og þú þekkir eflaust, en ég hef reynt að temja mér að gera það á málefnalegan hátt en ekki með því að ráðast á persónur, í tuðrusparkinu myndi það heita að fara í boltann en ekki manninn, að vilja alltaf sparka í manninn er samfélagslegt mein. Ég tel mig líka hafa þann kost að efast stundum um eigið ágæti og er því til að hlusta eftir því sem aðrir hafa fram að færa og hlusta eftir þeirra pælingum.

Ég býð mig fram til stjórnlaga þings í þeirri von um að fá að taka þátt í því sem að ég held að hljóti að vera markmiðið og það er að móta stjórnarskrá sem staldri ekki bara við í nútímanum heldur fylgi þjóðinni inn í framtíðina. Það er í mínum huga lykilatriði að sem breiðastur hópur komi að endurskoðun stjórnarskrárinnar því þannig að endurspeglast þjóðarviljinn.

Ég býð fram krafta mína til að taka þátt í þessu verkefni sé áhugi fyrir því. Ég tel að það sé kominn tími á endurskoðun á stjórnarskránni, en ekki það að það þurfi að kollsteypa öllu sem í henni stendur. Mínar hugmyndir varðandi stjórnarskrá snúa t.d. að því að...

...almenn mannréttindi verði í fyrirrúmi.

...þríksipting valdsins, hlutverk og ábyrgð æðstu stjórnenda ríkisins séu hrein og klár

...náttúru auðlindir landsmanna verði í eigu þjóðarinnar.

...heimildir Íslands til þátttöku í alþjóðlegu samstarfi séu skilgreindar.

...boðið verði upp á personukjör.

...beinna lýðræði verði komið á, t.d. með kosningum um ákveðin mál.

Þó mikilvægt sé að skýra stjórnarskránna gerist fátt nema að við breytum hugarfari okkar. Við þurfum að temja okkur meiri sjáflsgagnrýni, aga og virðingu fyrir reglum og umfram allt fyrir hvort öðru. Við erum öll á sama báti og ef allir leggjast á árarnar verður útkoman góð fyrir Ísland.

Nái ég kjöri mun ég mæta til leiks af opnum hug og vinna af heilindum og einset mér um leið að standa undir því trausti sem mér væri sýnt.

Það yrði mér mikill heiður ef þú settir mig í eitt af efstu sætunum hjá þér.

Bestu kveðjur

Gilli Hjartar - 3612

 

Nánari upplýsingar á bloggi og Facebook

Athugasemdir

[Kjartan Örn Sigurbjörnsson (IP-tala skráð) 17.11.2010 kl. 15:12]

Sæll og blessaður og gaman að sjá nafnið þitt meðal frambjóðenda á stjórnlagaþing.

Ég las með áhuga það sem þú skrifar á netsíðuna þína og allt er það gott og þér líkt.

Það eina sem ég staldra við og vildi biðja þig að útskýra fyrir mér er eftirfarandi: "heimildir Íslands til þátttöku í alþjóðlegu samstarfi séu skilgreindar."

Hvað áttu við?

kveðja til þín og þinna. kv. kjartan

[Gísli Foster Hjartarson, 17.11.2010 kl. 17:31]

Sæll Kjartan Örn

Þakka góðar kveðjur

Tek hérna brot af grein sem ég birti á vefnum fyrir nokkru sem og á nokkrum öðrum vefjum en þar segir.

Það þurfa að vera um það skýrar reglur í stjórnarskránni á hvaða hátt íslensk stjórnvöld geta gengið til viðræðna við önnur lönd/sambönd um sameiningu, samstarf eða samruna, komi til þeirra hluta. Samanber t.d. ESB, já eða t.d. norrænt ríkjasamband í framtíðinni. Reglurnar verða að vera þannig í stjórnarskránni að ekki þurfi að kalla eftir sérstökum lagabreytingum til þess að mega fara út í slíkar viðræður. Meirihluti á Alþingi á að duga, en það þarf jafnframt að vera á hreinu að ef  menn ná samningum í slíkum viðræðum að þá liggur endanlegt ákvörðunarvald hjá þjóðinni og hvergi annars staðar. Það eiga ekki að vera neinar vöflur á því. Þjóðin skal hafa úrlsitavaldið, það er fyrir mér lykilatriði.
 
Við hljótum að vilja að stjórnarskráin staldri ekki bara við í nútímanum heldur fylgi þjóðinni inn í framtíðina. Því verður þessi möguleiki að vera fyrir hendi við getum ekki bara skellt í lás. Stjórnarskráin á ekki bara að vera ætluð okkur heldur einnig afkomendum okkar og svo áfram. Því þurfum við að vanda frágang við ákvæði eins og t.d. þetta.

Þetta  er það sem ég átti við með þessu. - skýrir þetta ekki málið?

[Ragna Kr. Jónsd. (IP-tala skráð) 18.11.2010 kl. 15:14]

Finnst þér rétt að standa vörð um þjóðkirkjuna? Hver er afstaða þín til trúmálanna?

[Gísli Foster Hjartarson, 18.11.2010 kl. 18:41]

 Sæl Ragna Kr.

Biskupsstofa sendi mér spurningar um daginn. ég svarði þeim eins og þú sérð ef þú klikkar á linkinn. Vonandi segir það þér eitthvað.

http://fosterinn.blog.is/blog/fosterinn/entry/1115499/