Að deyja ekki ráðalaus!

Gaman oft að sjá hvað fólki dettur í hug. Verð að segja að mér finnst þessi hugmynd bæði fyndin og bráðsniðug. Tek undir með blaðamanni að það verður gaman að sjá viðbrögð yfirvalda við þessu. Er viss um að þau brosa yfir uppátækinu til að byrja með en fara síðan að fletta upp í reglugerðarfarganinu og setja lás á kappann. Þá verður hann væntanlega að færa sig út fyrir reglusvæðið og selja þaðan!!! Varla deyr svona frjór aðili ráðalaus?  ...nema að hann lendi þá í tollastríði við báknið.

Hitaperur í stað ljósapera

Athugasemdir

[Guðmundur Ásgeirsson, 4.1.2011 kl. 21:27]

Þessar perur eru nú þegar framleiddar utan evrópska efnahagslega einangrunarsvæðisins (EEES). Innan þess hefur ekki hvarflað að heilvita manni að fjárfesta í ljósaperuverksmiðju frá því að bannið var boðað, og þær eru því allar komnar til Kína, eins og reyndar flest annað núorðið.

En sá sem lét sér detta í hug að flytja glóðarperur inn á nýjum tollflokki (herbergishitarar) er að sjálfsögðu haldinn ómældri snilligáfu.

[Áfram Þróun!!! (IP-tala skráð) 4.1.2011 kl. 21:30]

Það fylgja sparperum ýmsir gallar, ef þær springa geta eiturefni losnað út og ollið alls konar sjúkdómum...Ef maður lendir í að brjóta slíka peru gerist þetta örugglega og þarf þá að kalla til eiturefnasérfræðing til að gera húsnæðið aftur íbúðarhæft, skilst mér. Hvernig sem það er allt saman þá á fólkið að hafa val. Stjórnvöld sem ætla sér að leika foreldra hins almenna borgara koma þar með í veg fyrir að fólk verði nokkurn tíman fullorðið, nái nokkurn tíman andlegum þroska, og.........þar með í veg fyrir að mannkynið nái nokkurn tíman næsta þróunnar stigi sínu. Þetta er hin eina sanna og rétta ástæða fyrir frelsi mannsins og valfrelsi, og að það eigi að vera sem mest, á öllum sviðum lífsins. Maður sem breytir rétt afþví hann á ekkert val, eða rangt, afþví annars verður honum refsað, en ekki afþví hann valdi, eða þarf aldrei að hugsa, afþví aðrir velja fyrir hann, er sem api í dýragarði. Þau stjórnmál sem stuðla að lýðræði, valfrelsi og ábyrgð á eigin lífi stuðlar að þróunn mannkynsins, og ekkert annað kemur í stað þess. Við eigum því að forðast eins og heitan eldinn allt sem hefur á sér fasískan blæ, lög um ritskoðun og aðra trójuhesta fasistans sem vilja koma börnunum okkar á bragðið og ræna þau lýðræðinu...

[Jón Logi (IP-tala skráð) 5.1.2011 kl. 08:16]

Haha, snjall náungi.

Er nú reyndar að skipta yfir í sparperur þótt að ég kyndi með rafmagni. Ég sé 2 meginkosti:

1: Hálft árið kyndir maður ósköp lítið, og því er þessi hitaorka til einskins.

2: Endingin. Einhverra hluta vegna endast nýjustu glóperur ekki RA$$GAT!!! Einhverra hluta vegna er maður að tala um meðalendingu upp á mánuð eða tvo. Stundum viku, URRR. Á meðan er elsta of fyrsta sparperan mín komin í 6 ár eða svo.

Þetta var ekki svona áður, en kannski er það vegna þess að nýrri framleiðendur eru slappari á meðan þeir gömlu hafa skipt yfir. Maður hefur verið varaður við að kaupa 230V perur (alltaf að taka 240), af því að okkar húsarafmagn er oftast yfir 230, - gjarnan svona 235-238

Engu að síður er hugmyndin góð. Svo eru til hitaperur, - þessar rauðu. Er t.d. með eina hjá hænunum mínum. 150W þó og birtan ekki mikil, en hitinn góður og endast nokkuð þolanlega.

Að lokum smá til hugleiðingar. Sumar sparperur eru alveg brennheitar. Þessar með spírulonum, ekki þessar "venjulegu" sem komu fyrst. Einhver skýring á þessu?

[Guðmundur Ásgeirsson, 8.1.2011 kl. 17:08]

Jón Logi: Ég deili með þér pirringi vegna takmarkaðs endingartíma glóðarpera. Ekki síst í ljósi þess að tæknilega er ekkert því til fyrirstöðu að framleiða glóðarperur sem endast í mörg ár, jafnvel áratugi. Ástæðan fyrir því að það er ekki gert er hinsvegar að framleiðendurnir græða meiri pening á því að framleiða einnota vöru. Sá hagnaður er á kostnað náttúrunnar því þaðan koma hráefnin sem er verið að sólunda.