Er þetta mál stærra en Eyjarnar?

Lýst ágætlega á að bæjarstjórnin ætlar að reyna að slást við þessa sölu á fyrirtækinu.

Hefði samt haldið að rétt hefði verið að bjóða Síldavinnsluna velkomna til Eyja fyrst þeir segjast ætla að gera út frá Eyjum. Ber ekki að fagna því? Eða viljum við ekki hvaða fyrirtæki sem er í Eyjum? Ég hefði haldið að fyrsta skrefið hefði átt að vera að fagna nýjum eigendum og ræða við þá og sjá hverjar fyrirætlanir þeirra væru áður en rokið var af stað - er þetta ekki allt til einskins ef þeir gera svo út frá Eyjum og áhafnirnar fá að halda lögheimili sitt hér. Voru menn búnir að taka af allan vafa um þessa hluti? Minnist þess ekki að hafa séð neitt sérstaklega um það, viðurkenni samt að ég hef ekki legið yfir þessu og gæti því hafa misst af því.

Verð nú líka að segja að það kemur mér á óvart hversu mikið þessi sala virðist hafa komið mörgum í opna skjöldu - finnst einhvern veginn menn alltaf hafa verið með vangaveltur um þetta síðustu 2-3 ár. Kannski reiknuðu menn með að þeim yrði boðið að bjóða í þetta. En það stóð klárlega ekki til boða.

Hvað ætlar bæjarstjórnin að gera við kvótann, já og skipin, ef að hún vinnur málið?

Er ekki rétt að spyrja sig að því? Fá umræðu um það mál - það er klárlega ekkert einkamál örfárra - menn verða að hlusta á umhverfið. Hefur bæjarstjórnin bolmagn til að berjast gegn þessu? Eru einhver fyrirtæki á bakvið bæjarins með það í huga að þeim og aðeins þeim verði boðinn kvótinn ef málið vinnst? Eða ætla menn svo kannski bara í kvótabrask við fyrirtæki hér innanbæjar? Menn hljóta þá að bjóða öllum útgerðum í bænum að bjóða í kvótann sem þeim áskotnast - er það ekki - eða á að gera þetta þannig úr garði að ekki geti allir styrkt sinn skerf af kvótakökunni.

Væri ekki bara fínt fyrir bæinn að eiga eitthvað af kvótanum eftir og leigja gegn tiltölulega vægu gjaldi til útgerða innanbæjar sem svo landa hér, veita vinnu og greiða hingað gjöld og annað eins og áhafnir þeirra. - bara hugmynd

Það hefur margt verið sagt hér í Eyjum í kjölfar þessa máls. Margt sem að manni finnst afar skrýtið, annað sem að maður á ekki orð yfir og sumt sem að maður getur alveg verið sammála.

þhlakka til að sjá hver framvinda þessa máls verður

„Málið stærra en Vestmannaeyjar“