Draumatalan 535

Mikill hiti hefur verið í umræðunni um þetta blessaða keppnisleyfi ÍBV í efstu deild að ári, svo framarlega sem að við komumst upp - en það er nú nánast í höfn.  Auðvitað eru svona kröfur nokkuð kræfar og sérstaklega að setja svona á félögin og ætla að taka refsinguna út á þeim þegar vellirnir eru eignir bæjarfélaganna – menn taka þarna félagið og kreista það – og það úr báðum áttum. Bæði knattspyrnuforustan og bæjarfélagið. Það hefur líka stundum gleymst á hvaða þrepi fótboltinn er í landinu, þá meina ég áhuga- eða atvinnumanna,  og hversu mikið á að berja áfram svona framkvæmdir.

Þetta með stúkuna hefur verið vitað í nokkur ár , þetta hefur verið einn af þessum punktum í leyfiskerfinu frá upphafi og bæjaryfirvöld hafa vitað af þessu allan tímann, og Gummi Þ.B. hefur verið með þessa hluti klára og ávallt bennt mönnum á hvað þeir hafa verið að kalla yfir sig. Á hverju ári þurfti maður að fara og sækja um bréf þar sem bæjaryfirvöld lofuðu hinu og þessu varðandi þessi mannvirkja mál. Það eru þessi innantómu loforð sem að KSÍ er í raun og veru í mínum huga núna að setja út á, margt hefur verið skrafað en minna um aðgerðir, þeir eru að setja pressu á aðgerðir, orðnir þreyttir á hinu.

Hvað skal gera?
Hörðustu stuðningsmenn vilja fá þetta í lag og það strax, skil það alveg. Fullt af fólki er alveg gáttað á þessum kröfum KSÍ, alveg hneykslað hreinlega, skil það fólk að mörgu leyti líka vel. Sumir eru svo harðir að þeir vilja bara að ekkert verði gert og á þetta verði látið reyna, skil það fólk líka að  mörgu leyti líka vel og því fólki finnst þetta vera frekja og átroðningur í nafni einhvers leyfiskerfis, þetta hafi aldrei þurft og þurfi ekki núna.

Staðan er sú að við erum með 535 sæti, ef að ég man þetta rétt, þurfum 170 í viðbót og þak yfir helminginn, til að uppfylla öll skilyrði með stúkuna

Stúkan er vitlausu megin segja margir – get alveg verið sammála því en hún er þarna og verður ekki flutt eitthvað annað – því verðum við að gera sem best úr henni að mínu mati. Okkur duga 2 hólf í viðbót, eitt við hvorn enda og við erum kominn með sæta fjöldann sem beðið er um. Þak yfir þetta gæti svo komið seinna, eða þak fyrst og sæta fjölgun seinna um þetta þarf bara að semja við KSÍ. Ég er ekkert að segja að ég sé sammála þessu, en bæjaryfirvöld hafa við þröngan kost verið að lofa þessu og ég vonast til þess að þau geti komið að þessu á einn eða annan hátt sem fyrst. En það þarf að koma saman verkáætlun sem farið verður eftir, ekki bara eitthvað innantómt plagg, og við fáum leyfið, er ekki í vafa um það. Ég sé ekki ástæðu til þess að fara að byggja nýja stúku sunnan megin við völlinn, held að það yrði mun dýrari vinna en að ganga í þetta norðan megin. Já já ég heyri alveg núna tuðið í sumum um að hér séu ríkjandi suðlægar áttir og ég veit ekki hvað, þetta eru bara 11 deildarleikir á ári + bikar í meistaraflokki karla, en vænti þess nú að aðrir flokkar fá nú líka að spila þarna. Menn hanna þak með veðurfarlsegar forsendur í huga, Stebbi Steindórs færi létt með það t.d

Við endann á stúkunni má svo setja gám þar sem er klósett aðstaða og sjoppa. Menn myndu þá í leiðinni geta hækkað öll auglýsingaskilti sunnan megin í 2 hæðir, meiri tekjur,  og skipað öllum áhorfendum að fara norðan meginn, hóllinn lagður niður. Með því fæst friður um annað sem menn hafa verið að fárast yfir og það er aðgengi áhorfenda að leikmönnum og dómurum í hálfleik og eftir leik. Stundum hefur verið nefnt að það sé langt úr búningsklefa og út á völl en það er náttúrulega styttra út á Hásteinsvöll en úr búningsklefunum á Old Trafford og út á völl en þar eru menn vissulega betur varðir – eðlilega, hyski sem fer á þann völl- he he

En hvað ætli KSÍ segi ef að ÍBV gefur það út að völlurinn taki bara 535 áhorfendur og síðan er bara uppselt? Það getur varla nokkuð verið að því, þætti skrýtið ef að menn fyndu því eitthvað til foráttu. Það eina sem skaðast þarna eru tekjumöguleikar félagsins, nema að eftirspurnin verði svona mikil að miðaverð rjúki upp!!!

Svo er ein leið í viðbót í þessu. Menn eru að fara að byggja knattspyrnuhús byggjum það bara í fullri stærð með stúku og öllu sem því fylgir og spilum bara hér eftir innan dyra á gervigrasi, fordæmið er komið fyrir hvoru tveggja þ.e.a.s. að spila innandyra og á gervigrasi – það hlýtur að vera ein leið í þessu.

Menn mega heldur ekki gleyma því að næst kemur krafa um flóðljós og þá væntanlega ljós sem lýsa svo vel að hægt verður að vera með beinar sjónvarpsútsendingar frá leikjum, allt fyrir Evrópukeppnina!!!!  - Mín skoðun er að menn eru að ganga fram úr sjálfum sér en það er bara þannig að þegar stolltið verður skynseminni sterkari þá eiga menn erfitt með að bakka og skoða hlutina í nýju ljósi.

Auðvitað skilur maður líka fólk sem er að reyna að reka byggðarlag svo sómi sé af að það sé pirrað að hlusta á svona þvinganir yfir einhverju sem er áhugamál fólks, og þetta á að fara að setja bæjarfélaginu skorður á sama tíma og það vantar leikskólapláss og menn í pólitíkinni hikstuðu t.d. fram á síðustu metra með að niðurgreiða skólafæði en gerðust skynsamir brutu odd af örlæti sínu og álpuðust til að gera það. Það eru nefnilega hin og þessi mál sem eru svo miklu brýnni fyrir þetta bæjarfélag til eflingar þess en steinklumpur með plastsætum, þó svo að menn langi í hann!!!!

En menn verða að ná lendingu í málinu, gera það faglega og þannig að það sé sómi af.

Athugasemdir

[JJ (IP-tala skráð) 2.9.2008 kl. 09:41]

Get ekki séð að það sé vandamál að stúkan sé norðan megin,  fullt af fólki sem er alltaf norðan megin og hefur alltaf verið það.  Það getur ekki verið stórmál að steypa stöpla fyrir límtré eða stálbita við núverandi stúku og klæða svo þak yfir.  Ekki stórkostleg framkvæmd.