Er þetta ekki....

...sami bæjarstjórinn og búinn er að vera gjammandi um að hér í Eyjum drjúpi smjör af hverju strái?

Því skyldi þetta þá koma á óvart?

Hér er víst engin kreppa! (en samt hafa lán fólks hér rokið upp sem og vöruverð og annað eins og annarsstaðar, eða er það kannski ekki partur af kreppunni? )

Vandi fylgir vegsemd hverri herra bæjarstjóri

 

Skorið niður um milljarð á tveimur árum

Athugasemdir

[Elliði Vignisson (IP-tala skráð) 16.11.2009 kl. 17:37]

Sæll Gísli

Skil ekki alveg samhengið .  Ég er með bréfi þessu að benda á hversu hart er gengið fram gegn Vestmannaeyjum í þessum niðurskurði.  Að benda á það er meðal þess vanda sem vegsemdinni fylgir.

Vissulega gengur hér vel.  Íbúum fjölgar, meðaltekjur nokkuð háar og atvinnuleysi lítið. Íbúar þeir ánægðustu á landinu og rekstur bæjarsjóðs og flestra fyrirtækja í jafnvægi. Jafnvel má segja að hér drjúpi smjör af hverju strái.  Það réttlætir þó ekki að að hingað sé sótt ómælt fé til að rétta af vanda á gömlu þenslusvæðunum.

Hef reyndar ekki heyrt neinn halda því fram að hér sé ekki kreppa heldur að hún hafi orðið til annarstaðar og komi minna við okkur hér.

Ef ríkisstjórn heldur sínu striki þá er hætt við að hér hætti að drjúpa smjör.  Það er punkturinn.

[Gísli Foster Hjartarson, 17.11.2009 kl. 13:55]

Sæll Elliði

Vissulega er staðan sennilega betri hér en víða en þó hafa sumir þurft að grípa til þeirra ráðstafana að lækka laun við fólk og/eða draga úr vinnu, þetta tengi ég að miklu leyti kreppunni og engu öðru, finnst margir farnir að halda að sér höndum.

 

Ánægjuvogin getur verið hættulegur mælikvarði, enda stutt síðan því var haldið fram að við værum spillingarlaus og hamingjusöm þjóð sem þetta land byggjum. Þó að ég efist ekki um dálæti okkar á byggðarlaginu sem að við búum í.

 

Þessi niðurskurður er óumflýjanlegur held að við gerum okkur báðir grein fyrir því. (Var nú ekki búinn að sjá úttekt þína sem birtist á öðrum stöðum þegar ég bloggaði en sá þetta svo í betri búningi á AMX í gærkvöldi.)

 

Held reyndar að við getum ekki reiknað með að flugið sé endalaust niðurgreitt – það hljómar í mín eyru svolítið ESBlegt, ríkisstyrkt og fínt – sá niðurskurður kemur kannski ekki á óvart, og kannski enn síður þegar verið er að leggja í hendurnar á okkur þá öflugu samgöngubót sem  ég, og reyndar þú held ég líka, teljum að verði með Bakkafjöruhöfn. Bættar samgöngur á sjó gætu eins undarlega og það kann að hljóma leitt til aukningar í flugi líka.

 

Jöfnunarsjóðurinn er væntanlega skorinn við háls víðast hvar og jafnvel að hann sé högginn í mittisstað víðar en hjá okkur – þekki samt ekki málefni hans í þaula eins og ég treysti á að þú gerir.

 

Renndi yfir þennan niðurskurðarlista að öðru leyti og held að menn hljóti einhvern veginn að geta tæklað þau mál sem þar eru skorin niður, eða í raun er það einfallt það verður að tækla málin.

 

Ætla nú ekki að hengja ríkisstjórnina í neina snöru, að svo stöddu, og held að í raun ætti ekkert okkar að gera það, að svo stöddu, – held að við gerum okkur öll innst inni grein fyrir vandanum sem takast þarf á við, og jafnvel rótum hans.

 

....en við getum kannski tekið að okkur sem fjáröflun að innheimta, og fengið til einkaafnota fyrir bæinn,  þær hundruðir milljóna sem afskrifa á á skúffufyrirtæki varaformanns Sjálfstæðisflokksins og manns hennar, 7 hægri,  ef minni mitt er rétt þá nemur sú áætlaða afskrift miklu hærri fjárhæð en því sem skorið er niður um hjá okkur og myndi sennilega fjármagna ríkisstyrkt flug til okkar í rúm 5 ár. – og þetta er fjárhæð sem sumir ætlast til að séu afskrifuð úr ríkisbankanum. (ath hef ekki framreiknað töluna á neinn hátt) – Með því að borga okkur gæti Þorgerður Katrín kannski þakkað stuðningnn sem hún fékk frá fulltrúum úr Eyjum á landsfundi flokksins síðast!!!